Kesejaten

Kesejaten

kaya-kayane wis taunan lara ning jiwa bli dirasa
wis wulanan nangise batin bli metu njaba
kebule kukus Jaman Kaliyuga unggal minggon unggal dina
jam-menit-detik kepaksa nyedot awa tengike dunya
bungenge kuping
pait-ledere ilat
mumete endas
ngos-ngosane napas
apa sampeyan masih ora krasa?

kaya-kayane wolak-walike jaman wis lawas bli dirasa
pirang-pirang abad sing liwat, sejarah bli diwaca
ukara lan tembung, welan pisan nulisaken Jaman Kalatidha
sing bener ora ketenger, sing salah malah dipuja
jahat, munggah pangkat
apik, kepaksa ditampik
lanang, ilang kaprawiraane
wadon, ilang kawirangane
apa sampeyan masih ora krasa-krasa?

kaya-kayane kesejaten urip mung ana ning aksara
mung ana ning duwur langit gawe bebeja
Jaman Kalabendu bladas-bludus ning bumi angkara
comberan ireng-geteng nggregogoti kapribaden menusa
duit dadi utama
kuasa dadi berhala
wong jawa karo separo
cina-landa tinggal sejodo
apa sampeyan masih ora krasa uga?

Supali Kasim
Dermayu, 2008